(طِلعُوا من الصدف الصناعى ) ، بقلم الشاعر المبدع / وحيد راغب

(طِلعُوا من الصدف الصناعى )
ياسين ياخال
مين غير مواربة للبيبان
ولا شخطة بتمزَّق فؤادى
مين اللى قال
إن العرب ملعون أبوهم
لما بيعدوا السؤال
ويناموا فى بطن الإجابة
يشخَّروا
باحلام عصيَّة
والبندقية فوق دماغهم
رصرصت
من برد هم
من جبنهم
من فرقة خانقة
حتِّموها ع العيال
أرجوك ياخال
ماتحط دمعة ف عينى تبكى
أو تزرع مشاعر ف الصدور
الأرض بور
والنور بيعزق وسط شمسه
بالفؤوس
ما بقاش يأثَّر فى الشغاف
طرحة بيضة فوق عروس
ولا حضن دافى بالعنين
ولا حتى بوس
برعت مواخير الجسد
ومجامر الودع الهسيس
إشرب يا خال وبلاش تصحصح
فى السحر
نجمة وقمر
الرسمة حطَّت والجناح
هاض واندحر
ارجوك يا خال
لو كنت حاسس بالعرب
أو فرقة بتمُر بطرب
ما تقولشى عنهم إنهم
دخلوا ف مملكة البشر
ما تقولشى حد ف الإناء
وضع المنوِّم والخدر
هم دشِّنوا سفن العجايز
والرجائز
والغجر
طلعوا من الصدف الصناعى
بعد وخزة
ومؤتمر
واتصنِّفوا تحت الوسادة
غبار سفر
ما عاد بيألمهم طفولة
اتيتمت
أو أم ثكلى ف الصراخ
اترملت
ولاشيخ بينفخ ف الكفوف
من برد عمره اللى انقضى
بين الرفوف
واتخلَّعت أحلام بيمضغ
فوق ضروسها
حكمة ناشفة فوق رغيف
عدت عليه
نسمة ناداها واترمى
يحضن هواها قهقهت
وقالت له صيف
ارجوك ياخال
لو كان ف موتى هاتجاوبنى
على السؤال
موِّتنى يالله
خلَّصنى منِّى ..من التحيُّر
والخبال
العمر دمه بينسحب
إيه فايدته
لو إنه طال
الشاعر وحيد راغب