( تعالى يا دنيا ) ...بقلم الشاعر / محمود عبد العظيم

( تعالى يا دنيا )
----------------

ياما كتير عرفناهم
وعشنا حياتنا وياهم
ناس بننسى ايامهم
وناس ولا لحظه ننساهم

ناس عايشين يحبونا
بننساهم ما ينسونا
وتبعدنا الحياة عنهم
يحنوا لينا ويجونا

يادنيا ليه تعاندينا
وتوهتى خطاوينا
بنلاقى إللى عايزنهم
ف لحظه يبقوا مش لينا

بتمشى معانا بالمقلوب
وحيرتى معاكى قلوب
كفايه وسيبى كل حبيب
يعيش عمره مع المحبوب

تعالى يادنيا نتصالح
وننسى أمسنا الجارح
ونتصافا عشان بكره
يكون احلى من امبارح

بقلمى/محمود عبد العظيم