حوار مع نفسى :: شاعر الغلابه المبدع أ / ايمن البلاط

‏‏ايمن البلاط‏  

حوار مع نفسى 
شاعر الغلابه
ايمن البلاط
اوعاك فى يوم
تنصح حد نصيحه
خلى سرك فى عبك
وبلاش فضيحه
اصل النصايح بتتاخد تهم
وفى الأخر انت اللى هتتظلم
بقولك اسمع كلامى خليك فى حالك
بدل ماحد يقولك انت مالك
وتسمع كلمه ولاغمزه مش هترتاح
وتفضل لحد الصبح بكاء ونواح
طيب كان ليه من الأول
مكنت سكت وبالى اطول
انا مالى ومال غيرى
انا بس قولت اريح ضميرى
ياعم اسمع وبلاش مناحيه
وخلينى قاعد معاك شويه
نجيب فى سيرة الناس
على شوية نميمه
ماهو اصل الأصول
بقت فى زمنا جريمه
تانى هتتعبنى معاك
هى الناس هتمشى على هواك
كل واحد ينام على كيفه
ويحب اللى يجى على طيفه
اوعاك تانى تعملها
هسيبك وامشى من اولها
انا نبهت عليك وخلاص
مش دا زمن الحب والأخلاص
خلاص ياعم متزعقشى
ولا اسيبهالك وامشى
انت بردو لسه بتقاوح
يابنى الحياه ماشيه مصالح
تصدق كلامك صحيح
واهى كلها بدع وتباريح
تعمل شريف تاخد
على وشك كفوف
ومش بعيد تبقى زفه
بالطبول والدفوف
معقوله تبقى فضيحه
للى رايح واللى جاى
اقعد تعالى دانا
لسه هعملك شاى
والقعده لسه هتحلا وتحلا
انت عايزها تعدى سهلا
ياعم هتعدى انت
عامل ليه مشكله
كلها خطوه مش
احسن ماتلف سنه
ياعم نسيتنى كنت هقولك ايه
اتنيل كنت بتتكلم على النصيحه يابيه
اه فكرتنى
تصدق بكلامك دوختنى
طيب اعمل ايه
ولا اروح اكل زلط
طيب اعمل الصح
معاك بقا ولا الغلط
يخربيتك هو انت حمار
بفهمك بقالى زمان
مختصر الكلام
ملكش دعوه بحد تمام
تمام ياسيدى
شاعر الغلابه
ايمن البلاط