(وشبابنا لايص فى الميدان ) بقلم الشاعر / وحيد راغب

(وشبابنا لايص فى الميدان )
أصل الأصول
قطر الوصول
ماهوش ملول
الساقية دايرة 
والطريق مليان فلول
هبهب يا صوت المغنمة
ثورتنا غربالها اتقطع
بيعدى منه من سِمٍن
زى الهزيل
لا تقول دافصلة أو علامة
أوشدَّة منخرها طويل
لا تقول دى ضمة أو دى كسرة
أو دى فاتحة ع الطلول
ساعتين يدوبك م الفانلة

ونرعوى
يرمقنا شذرا ننزِوى
لا ملف بانفع أو تحرِّى
سرك ف سرِّى
والميدان
قتلوه ف عركة
سرب الناموس هو الجاسوس
هم درَّبوه من ألف بركة
قطر الوصول
هم برمجوه ..طحنوا هواه
وشبابنا لايص فى الميدان
معلول وتاه
بيقولوا ضل من الحياة
دخل العناية الفائقة
سرقوا الرئة
والكليتين

حلفوا اليمين
هوَّ اللى باع
هوَّ اللى فبرك ثورته
تحت السماع
هوَّ اللى صنَّع
تحت سِلِّمه القناع
صيحات منام
ما درسش أسس المعمعه
والبوستجية والحرس
والمخبرين
ما عرفش فين البرتقانة
ولَّا سكينه الهجين
ما عرفش يلضم إبرته
بإيده اليمين
ظنه وقوفه راح يمثِّل
أو يغنى
أو يكون
كل المسارح هجمته
وانفض جمهوره الحزين
من طلخا حتى مستطرد
..سيدنا الحسين
الهم سرْجُه قطَّعوه
والخوف حُرَن
عشِّش على أيك الخدود
أسراب فتن
والجرَّافات طِلعت صينية
صنَّعوها من بلاستك
عشان تعيش
خلوا ضميرك زى أستيك
النار بتخرج من ضلوعى
زى بركان الأصيل
والراس على عنق التحرُّر
م الرياح سقطت بميل
ولقيت على أرض السياسة
جنب قطر المستحيل
غطوه بجرايد
ما اقدرتش اكشف جثته
يا يكون أنا
الشاعر وحيد راغب