ارسم قلوب طيبة $$ للشاعر المبدع أ / إبراهيم بـدر

ارسم قلوب طيبة

من ربها قريبة

وارسم حنين جوا النفوس

هنقولها مية مرحبا

أرسملي شجرة

نتحامي تحت ضلها

من شرد جاي فارد جناحه

من خبث جاي معاه وبا

أرسم وشوش متبسمة

أرسم قمر وياه نجوم

ونوره مالي السما

وارسم كمان كام مركبة

تحمي القلوب م الهوج

من موج غريب وصل السما

وارسم حياة مافيها خوف

تكون حياة مش مرعبة

ممكن كمان ترسم أنا؟!

ولا عندي خوف ولا عنا

وانا أصلي فرحان بالهنا

وقلبي فرحان بالصبا

ارسملي خير ملو الغيطان

وعيدان لقمح مسنبلة

قلبي يحس بالأمان

روحي تقول البسملة

والجدة قاعدة ع البيبان

حواليها مية بنت وولا

ابراهيم بدر عبدالله