فوق كتافه شايل اسمك $$ بقلم الشاعر / فهمي علي

هو دا الواد اللى لسه 
فوق كتافه شايل اسمك 
و اللى لسه ما بين ضلوعه 
جنب قلبه لزق رسمك 
و اللى مش عارف يخونك 
و اللى فى الاحزان مقاسمك
و اللى لسه بيحلف انك
فى الوريد دمه اللى سارى
و انك الضحكة الشريدة
فى الشوارع و الحوارى
و القمر ليلة كماله
و النهار ساعة البدارى
هو دا الواد اللى صاحبه
خد رصاصة فى نن عينه
و اللى راح ملفوف فى علمك
ويا ايامه و سنينه
هو هو الواد بعينه
اللى لابس بدلة زرقة
اللى عفريت حلمه راكبه
و اللى صورتك عنده فارقة
اللى لما القاضى شافه
و فى عيونه دموع و حرقة
و اللى عنده الف تهمة
كلهم ان انتى روحه
و انه حاسس بس جرحك
و انه مش فاكر جروحه
و انه مش عايزك تموتى
بين ايدين ما بتختشيش
فبيقف يهتف باسمك
و الهتاف ما بينتهيش
و اللى راضى يموت فداكى
انما يناير ..... يعيش
فهمى على