باعتبارى ضد نارى :: بقلم المبدع الشاعر / وحيد راغب

مطبخى معروف بنهجه 
باعتبارى ضد نارى 
باعترف إنى انتحارى 
ف اختيارى للمحبة 
لا انقسم تحت انتصارى 
كعب عالى أو عبيد
كل بحر وله سفينة
وكل حى وله نشيد
امتلك زحافة بيها
انطلق فوق الجليد
امتلك شمسية مصريى
لما اعدى الاستواء
والحرارة نار جهنم
تشوى كل الاحتواء
واختفى بين الحبايب
لما اكون بين العروق
شمس ضوءها فينا سايب
سلة مليانة بشروق
مطبخى معروف بنهجه
راس بتعلى ف العلالى
راس بتعرف كل ذوق
نفسى احرر عين بتقرا
من حروف مليانة شوق
والقلوب سجانها يفتح
زى فجر بليل عتيم
الجناية ف السقاية
لما كاسها يكون سقيم
الطرق وفروعها ربكة
واللى باقى المستقيم
عش حياتك
فوق غصون الحب غنوة
كن كنارى أو عنادل
رايحة جاية بالرنيم
أو زهور نشرت عبقها
لكل عاشق للنجوم
باعتبارى مش هادارى
أى ضحكة أو بكاء
هانتزع من النهر جريه
وسط صخر بدون عداء
هامتطى ضهر الحمامة
والهديل هايقول سلام
ويا غصن القلب يمكن
يختفى منا العتام
ينسكب فينا التحايا
والهداية والغرام
السلاحف مش أملنا
والتعالب والذئاب
كل ما يهدى لنا بالنا
نتوحل جوا الخراب
منا فينا
فينا منا
أو من خارجنا ف الخرايط
خط لينا كم سراب
إيه جرى لنا
هو مجدافنا انكسر
والنوح بيعلى والعباب
باعتبارى ضد نارى
قمت اخنق ف الزلازل
والمغازل فاتها نولها
سلك عازل
مش بكهرب أو يغازل
والفصائل
A و B
أما O تجميع شتائل
أى فيض من دمع نازل
حس مكبوت الحنان
والحنين والحزن قاتل
أى لوحة مختفى منها النهار
كل خط فيها أحمر
أو مشعشع فيها نار
راح دافنشى
معاه بيكاسو
مختار بينزف بالعمار
حمام فراعنة والسواقى
ودونكشوت
أى جن فينا حط
الطفولة عيونها شافت
راس فى يمة وايد فى يمة
ودم سايح
والقبايح دين ضحية
كرس عرش أو هوى
مش نور لفجر
هو لما الليل يكون
ضلمة عتمة فى العقول
ايه تسمى إللى بحصل
غير بفجر
الشاعر وحيد راغب عضو اتحاد كتاب مصر