م تهمِّلينيش ..... بقلم الشاعر المبدع أ / رفعت أبو العلا

م تهمِّلينيش ........ عاميّة

................................

يامهمِّلاني ، وسايباني لوحدي

على مهلِك ... م تهمِّلينيش ...

كارهاني ، وناسياني .. مَ تِهْدِي !!

وباندهلِك ... م تكلِّمينيش ..!!

أنا عمري ما ف يوم هَمِّلتِك ،

ولا فوق حِملِك .. أنا حَمِّلتِك ،

وباشيل عنِّك ... مَ تشَيِّلينيش

هوّه انا لو يوم اقدر ....

أقعد من غير م أفكَّر ....

فيكي زَي الدراويش ....

كنت ابكي عليكِي ، وابكّيكي ،

وبدمّي افديكي ، وأرويكِي

حلِّفتِك باللّه عليكِي .....

خلِّيكِي ، وم تهَمِّلينيش

دَ انا لحم كتافي من خيرِك

وهدِّتني الغُربة مع غيرِك ،

وف عِشق هواكي انا أسيرِك ،

ومكاني ، وعنواني .. مصيرِك

تسيبيني لوحدي .. أنا ووجدِي !!

طَب دا انتي هنايا سبب سَعدِي

يا أحلى ما يُمكن تتشاهدِي

دا انا عاصي معاكي بقيت مَهدِي ،

وف سُهدِي مَ تبَهدِلينيش

دا انا إبنِك ، وهنايا ف سعدِك ...

وغير حُبِّك في الدنيا ما ليِش

ضمّيني ف حُضنِك بسواعدِك ،

وعلى مهلِك م تهمِّلينيش

لأنّي من غيرِك بصراحه ....

وحياتِك ...

م اقدَرش أعيش ....

وحياتِك ...

م اقدرش أعيش ....

....................................................

الشاعر / رفعت ابو العلا