على واحدة ونص ::: بقلم الشاعر المبدع أ / محمد ضباشه

على واحدة ونص
محمد ضباشه

قالوا : فنون الرقص
أنا قلت : طبعاً عيب
بقلة أدب بنبص
لحاجات ورا الشراشيب
وبروز كتير تتهز
فعلاً معانا تجيب
وعلى واحدة ونص
عقولنا تروح وتغيب
على كل حتة ترص
نظرات كتير ما تخيب

قالوا : دا فن جميل
قلت : عشان عريان
ينزل ريالتك سيل
لما الحاجات بتبان
وحركات تصحى ليل
من زمان نعسان
وترجع بهد الحيل
وخيبتك علينا تبان

قالوا : دا أكل عيش
قلت : دى لقمة حرام
شبابنا لاهم دراويش
ولا صبرهم فى مقام
دى مهنة هز وطيش
ومسخرة فى افلام
ولا غيرها مفيش
يحلى عليها كلام

قالوا : واد رجعى
قلت : وعندى دين
ازاى أسمح لنفسى
ألعب مع الشياطين
خليك أنت عصرى
وأرقص مع التعابين
معاهم ضايع ورسمى
وهتبقى عشتك طين

قالوا : يحيا الغرب
قلت : وأنا مالى
دى فنون للحرب
وأنا أدبى رسمالى
ناس حياتهم كرب
مايصدروا الغالى
وأنسى أصول العرب
والرقص يحلالى