مصر تاريخ وجغرافية :: بقلم الشاعر / حسني الجنكوري

مصر تاريخ وجغرافية
****************
.
مصر يابني دي بلا قافية حكاية.....
تاريخ وجغرافية
يجور عليها الزمن بغدره وأنيابه...
وتهب متعافية
شاب منها الزمن ولساها ..
فرسة عربية
.
تتوبك وتدوبك وهياها ...
زي ما هيه
هي أرشيف للحكم لمليون
حكاية محكية
منها أختار أبو الأنبياء هاجر
لأجل ذرية
.
ولدت له أبو العرب وخاله
وخالته مصرية
من يومها المصري أصبح
خال الحجازية
علي ترابها اتقلبت عصا موسي
الي حية
.
والعدرا ووليدها هاجروا لها من
سب وأذية
ومقوقسها صاهر نبينا من بعده
بستنا مارية
وأنطونيو داب وسلم لغرام
كليوباترا البطلمية
.
وزبيدة نست مينو أسمه
ورطنه الفرنسية
هيرودت قالها : مصر دية من
النيل هدية
رد حمدان : مصر في الزمان
والمكان عبقرية
.
فاكرين حطين وصلاح الدين
وحروبه الصليبية
فتحت له مصر باب النصر و
لجيوشة العربية
والمنصورة اللي أسرت لويس
وحررته بفدية
.
مصر أم أنور ونجيب وزويل
والشهرة بهية
أم عواد اللي تاه وعاد لل
التوتة والمية
مظهرها بسيط وجوفها محيط
حضارة منسية
.
أم كحلة تحت طرحة أم
الضحكة المستحية
أبنها الأسمر مارد وبنتها
الحلوة خمرية
تغمس الرضا في طبق القناعه
باللقمة الهنية
.
وأنا لو وافتني المنية مفيش
عرب بعديه
أنا التاريخ والمجد أنا أسمي
أم الدنيا
........................................( حسني الجنكوري ).
________________________________________________