حقيبة ذكرياتى ::: للشاعر المبدع أ /: محمد ضباشه

حقيبة ذكرياتى
للشاعر : محمد ضباشه

فتحت حقيبة ذكرياتى
لقيت جلدها مبلول
وكل الرسايل بتبكى
والصور تملى تقول
محبوسة بقالى سنين
أنا وناسها اللى جوايا
واللى لما شافونى
شاركوا الفرحة ويايا
هملونى وهما أتفرقوا
وما حد منهم جانى
ولا مرة جم يزرونى
ويطفوا أحزانى
عايشين ما بين الرسايل
وكل ساعة فى حال
رسالى تقولى هترجع
والتانية تقولى محال
والتالتة تقول أصبروا
دا حبل المودة وصال
والرابعة تمسح عنيها
ودموعها متفرقة لنهرين
بتفكرنى باللى أتكتب
وما تعرف مصيرة فين
واللى بتترجانى أقراها
وأرجع زمانها من تانى
فقلبى منى أتشرح
وأنا سامعة بودانى
بيقولى نحن هنا
وبصوتها نادانى
معقول حبيبى أنساك
وأنا وأنت متعاهدين
وحلفنا نسامح بعض
ولو كنا متخاصمين
ورسالة مش باصة عليه
وعنى مديرة عنيها
مسكتها وفتحتها وقريت
وعرفت ما فيها
ساعتنى صابنى السكوت
وقولت فين هلاقيها
قفلت تانى الحقيبة
وقلبى لقيته مقفول
بكلمة عمال يرددها
وأنا وهو نقول معقول
الحب دا كله
بعناه فى غمضة عين
ولا حد مننا بايدية
جفف دموع العين
ويرد عقلى علينا
كن راضى بالمكتوب
وأرفع يديك للسما
والرب رب قلوب
أكيد هيلبى نداك
مدام معاه محبوب