أنتم بقلب أبو لهب ::: للشاعر المبدع / : محمد ضباشه

أنتم بقلب أبو لهب
للشاعر : محمد ضباشه

والله عبيط وأهبل
ياللى تبعنا بحبة ريش
وتنزل من مقام الوطن
علشان تعيشها مفيش
وترمى دماغك فى أفكارهم
وتخليهم يلعبوا فيها
ويحولوا سماحتك لارهابى
وتفرح وتقول أنا ليها
وخلتهم يزرعوا جواك
كره الوطن والدين
وخلوك تبيع والديك
علشان تبوس دولارين
وتقتل أخوك بفكرة
غبية وماليها أساس
بعد ما عطلوا دماغك
وقتلوا فيك الاحساس
وعشت حيران وتايه
ياقاتل أو تكون مقتول
وعايش طمعان فى جنة
رسمهالك راجل مخبول
وأنت عارف اللى بيقتل
على طول يخش النار
ماهو دينا كدا
وماينفعش معاهاهزار
ودايما تقولوا أنكم على صح
ويبقى أحنا ناس جاهلين
تحكمونا قوة بلا اقتدار
وعوزينا نعيش ساكتين
بيدك تعمر دماغك
وترجعها لأصلها فى الحين
اسلامنا دين السماحة
واسلامكم بكا وأنين
صدقنى الرصاصة خسارة
فيك وفى كل أمثالك
وحبل المشنقة حلال
على كل افعالك
وعلى أى حد فاكر
أنه يقدر يحكمنا باسم الدين
والدين منه براء
وامثاله ناس ملاعين
ما نعرفش نبيع القيم
اللى اتعلمناها بقالنا سنين
أحنا قلوبنا معاكوا صفا
مليانة ايمان وحنين
وأنتم بقلب ابو لهب
فى عباية صلاح الدين