(ارجوك سامحنى يا آلان ) ،، بقلم الشاعر المبدع / وحيد راغب

(ارجوك سامحنى يا آلان )
كل صورة وانت طيب 
البيبان مقفولة يا ابا 
العصابة جوا منك 
تتلاقيها ف الخرابة 
ليه تدمع وانت سامع
وانت شايف
لسه مارفعت الجنابة
ليه بتصرخ والالم
من كتر صمتك
قام يهاجرك
القرون الوسطى عدت
م الضلام
وانت فجرك
مش بيطلع
والحمام
لغصونه بطفش والعيون
تركت جفونها
هو جفنك لسه برمش
يااااااااه .........آلان
الدنيا غرقت والجولان
دخلت دمشق
والحيتان لولادنا فاقت
كل عشق
يا امه لومى قلوب سقيمة
لو ألف مرة جالها غيمة
مش بتصحى
غارقة وسط الدم قبل
ما يغرقها بحر
السيوف دبحت تاريخها
والبشر أصبح ضحية
بعد عرفة يومنا نحر
آاااااااااه يا يومه
انت فين لما جرهم
خلتيه يشرب ويسكن
والطيور ف اديكى تنعس
م الامان
الأوان ما أوانشى لسه
والحيطان بلعت وجودما
والرهان
إن احنا نرجع جاهلية
والعمامة تفك روحها
فارسية
الهنود الحمر بادوا
واللى بقيوا واللى عادوا
حرفهم ديناميت وقسوة
يشربوا فى الكاس دمانا
والقلوب مليانة نشوة
يا االله يا آلان نغادر
عند ربى
العروبة جالها شوطة
والعرق راح يمسحوه
بالخجل والخوف وفوطة
منا شاكية وسخ حياتنا
إن ذاتنا زى كورة
ف رجل سام
والمقام سكنه الأبالسة
أى ذكر مش حقيقة
أو غرام
أى ذكر مش بيطلع
م القلوب
أو بينزل م الحناجر
كل بيعة وانت طيب
يا آلان
احنا بيسوقنا تاجر
ربحه احسن من دمانا
وف شريعته
صفوا بعض وريحونا
واللى ضايق بحر واسع
يبلعه
عمر شوفت الموج بطبطب
أو رياح
الجناح مكسور آلان
والرومان
رجعت وفارس
الحنان بقى برد قارص
يا آلان
والجنان فرشت ورودها
قم وطير
زقزق وغنى
قلبى كلنى م الوجع
والنار ف ننى
ارجوك سامحنى يا آلان
ماعندى حيلة أو قرار
بس عندى بين ضلوعى
ألف تار
ربما ف زمن اللى آتى
أبقى فارس
مش حمار
الشاعر وحيد راغب عضو اتحاد كتاب مصر