حلم ليلة صيف ::: شعر المبدع المتميز أ : محمد ضباشه

حلم ليلة صيف
شعر : محمد ضباشه

فى ليلة صيف خلتنى
وأنا صاحى أنام نعسان
وأحلم بأنى أنا وإنت
فى جنه ما فيهاش إنسان
شدتنى عيونك السودا
لشط بحر كله أمان
بنيت عشى ما بين حضنك
وكان عطرة ورود وريحان
أقطف من على خدودك
زهور تكفى ميت بستان
وأشرب من بحور قلبك
كاسات مليانه دفا وحنان
وأقرأ حبيبتى فى عيونك
حكاية اللى نام عطشان
وجت له حوريه من الجنة
لابسه من الحرير فستان
وعلى الشعر شريط أبيض
خطف بصره من اللمعان
وكاس الحب فى إيديها
وكان باين عليه مليان
شرب من الحب وإستكفى
وقال تمام أنام شبعان
ونسى فى الحلم أشواقة
ونسى اللهفة والحرمان
ونسى فى الحر يتقلب
على جمر من البركان
وجو الليله بقى جنة
ولا فيها حر عاشة زمان
وصحى من نومه بيدور
وفى الاخر قعد زعلان
لما خلاص خلص حلمة
وجو الحر تانى بان