أنا والليل ::: بقلم الشاعر الرائع أ / محمد ضباشه

أنا والليل
محمد ضباشه

أنا والليل بنستنى
نشوف القمره من تانى
تنورلى أنا وليلى
وتمسح عنى احزانى
وأعيش وياها على نورها
وأقول يا حبيبتى وحشانى
بقالك عنى سنين غايبه
وغيبتك والله ألمانى
مشتاق لعيونك السمرا
مشتاق لحضنك الدافى
تعالى وقربى منى
ليه بس لقربى بتخافى
د أنا قلبى ملاه حبك
وحبك أنت خلانى
أعيش بالفكر من بعدك
وليه فى القرب هجرانى
تعالى نصحى أشواقنا
ونقول للصبر كفيانا
ونزع فرحة فى قلوبنا
ونخلى ليلتنا فرحانه
وأقول يا قمرة ما تغيبى
خليكِ جنبى وأستنى
وأنا معاكى أكيد طاير
عايش فى الحب متهنى
وأنا والليل بنستنى
نشوف نورك ظاهر تانى
ينور كل دنيتنا
وأقول يا حبيبتى وحشانى