حقوق النشر محفوظه :: بقلم الشاعر المبدع / عصام دويدار

Essam Dwedar

حقوق النشر محفوظه
وكل خطوه محسوبه 
علي الكلمه اللي مكتوبه
تموت وهي مولده 
لازم تمشي مع الموضه
وتكتب زي فطوطه
كلمة حق مقلوبه
او لمه تحكي حدوته
تكون واضحه ومفهومه
وياريت مع طبل او مزامير
وترغي كتير...........
وتكتب بكرا جاي بخير
وتحلف ان فيه تغيير
كلام واضح لشمس الليل
مفيش تحويل عن الخطه
ولا كام تاهوا في السكه
ولا في شباب علي الدكه
ولا ينفع تقول شكوه
يا اما ........................
حقوق النشر محفوظه
وتبقى الكلمه محبوسه
وبردوا هتبقى مدسوسه
عشان تلحس ..........
عقول في الاصل ملحوسه
حياتها وعشقها الكوسه
تراضيها بكام بوسه
على كام ضحكه مغشوشه
فهمت اللعبه ماشيه ازي
لازم يابني تكون رغاي
تشوف الحق ماشي يمين
تسيبه وبردوا تمشي شمال
خلاصة الحال .................
تسلم القلم في الحال
تمشي في ضلة الحيطان
وتبقى جبان ..................
وايه يعني ما كله جبان
لازم يشكر ولو متهان
وبعدين لما يتمكن
يقول عنه كان ياما كان
دا كان شاعر كلامه جنان
وزير في وزارة الاسكان
بذور خيره في كل مكان
كاتب ابياته من قلبه
وعمره ما خاف علي عمره
يدوب الشعر من أدبه
حقوق النشر محفوظه
عشان خاطره.................
......................................
عصام دويدار