مملكة النمل ::: بقلم الشاعر المبدع / طــه إبـراهيــم

الفكرة مستوحاه من فلم صرخة نملة

مملكة النمل

********
اوعي تقول للنمل حقوق
اوعي يبص النمل لفوق
خليه ساكن بطن الارض
مالي الدنيا تراب وشقوق
طالع واكل نازل واكل
أي طعام ف البيت بيدوق
لحم بياكل سكر ياكل
حتي البيض لو كان مسلوق
هو خلاص النمل إتجنن
جاي دلوقتي النمل يفنن
عايز يلغي أي فروق
أما صحيح والله عجايب
شفنا كبار النمل الشايب
المجنون بيبص لفوق
عايز رغبه وحب وشوق
عايز منصب عايز قيمه
عايز عشه نظيفه سليمه
عايز تبقي الروس متساويه
عالم فاضيه وعالم غاويه
نفسي تقول للنمل نصيحه
قولها ف ودنه بجد صريحه
يمكن يرجع تاني يفوق
يعرف إن الدنيا منازل
واحد تحت واحد فوق
وإن تاريخ الناس مقامات
شوف كم واحد طق ومات
واللي اتشرد واللي إدمر
واللي الطب ف أمره إتحير
واللي حصله ياما حجات
واللي الدنيا قامت ضده
أي بلاوي عليه بالذات
من ف النمل إتثر بيه
فكر مره يطل عليه
راح ف الشده وقال سلامات
جاي دلوقتي تقولي حقوق
قول للنمل الثائر فوق
إجري ودور فين السكر
عايزك تجري وتجمع أكثر
عايز تكبر جوه السوق
أما صحيح أغرب مخلوق
ينسي بسرعه أي جمايل
يشكي كتير من حاله المايل
طول العمر يقول مزنوق
دنيا وفيها الناس أنواع
واحد جد واحد باع
فيها فقير والتاني مرزوق
فيها الرايق والمخنوق
فيها الابيض والمحروق
فيها العايم فوق النعمه
وفيها اللي بيستني اللقمه
وفيها اللي ما يعرفش الذوق
إمشي يا عمي تلائي كتير
دنيا وعمله زي السوق
نفسي تقول للنمل إتلم
نفسي تقول للنمل يفوق
قوله هتفضل عايش نمل
تطلع نمل تنزل نمل
عظمك طري مش أد الحمل
فاكر يعني المنصب سهل
ليه غرقان في طريق الجهل
احنا الساده وانتوا عبيد
احنا نخطط وانتوا الإيد
إحنا عقول بتبص بعيد
احنا قلوب مليانه حديد
أحسن فطره بنضحك فيها
لما نشوف النار بتزيد
لما نشوف النمل بيبكي
يبقي هنرجع تاني نعيد
إرجع تاني يا نمل لأصلك
إدخل بيتك وإدخل فصلك
دور علي فتافيت السكر
إقفل عقلك إوعي تفكر

*********
بقلم / طه إبراهيم