محاكاة لأغنية ( يامسهرنى :: بقلم الشاعر أ / محمود عبد الخالق عطيه المحامي

............................محاكاة لأغنية ( يامسهرنى ) ……………
ما زاركش طيفى فى ليل
زى مازارنى
ياحبيبى طيفك على طول
يامحيرنى
ماخطرش على بالك يوم
تقرب منى
وتشوف عذابى فى يوم
يامسهرنى
أنا قلبى بينده لك
فى سكونه وحركاته
ويقول لك بقى يعنى
ما بتسمع دقاته
أمال نعيمى ف قربك فين
وفين حنان قلب عليا
وفين حلاوة وردك فين
فين أمانك ياعنيا
ياكوينى
وقلبك كده خالى
وخيالك
مرسوم على عينى
طاوعنى
وارثى على حالى
وارحمنى
من حر أنينى
لا عنيا يصالحها النوم
ولا يرتاح بالى فى يوم
ولاعمرك أبدا ياظلوم
تيجى مرة
وتسأل عنى
اسأل عن اللى يبات الليل
بين الألم وبين الفكره
يصبر القلب الملهوف
ويقوله د الرؤيا بكره
وبكره نموت
وبعده سكوت
ولا كلمة ولا تجوال
وهو العمر
لمين بيدوم
وانا حالى ف بعادك حال
يامنوم النوم فى عينيه
حيرت أفكارى وياك
الصبر مش صابر عليه
ارحم فؤادى من نار جفاك
أقول لروحى أعمل له ايه
يقولى قلبى انده عليه
تلاقى طيفه
جه فى الخيال
وساعتها اسأل الحل ايه
تعالى شوف الغرام والويل
في طلتك أعياد عمرى
الهجر نار والقلب ذليل
وليالى العمر دقات تسرى
طالت الاحزان
ومعاها ألام
وف قلبى كلام بدى أقوله لك
وبروحى هيام
واشواق وغرام
تعالى حبيبى أوصفهولك
ونعيش أيام
ولا في الأوهام
وقلوبنا تغنى ونقول ياسلام
يانسينى
وانت فى كياني
اسقيني
من كاسات خمرك
ارحمنى
ورق على حالي
خليني
أتملى بحسنك
وانا عيني يجيها النوم
ولا أشكي ولا اقول ياظلوم
ولا قلبي يئن فى يوم
ويدعي لك ياحبيبي يدوم
هنايا فى قربك على طول
يا محيرني يا يا يامسهرني
بقلمي محمود عبد الخالق عطيه المحامي