عناقيد فرح $$ بقلم الشاعر المبدع أ / .محمد عسل

عناقيد فرح

زرعت صورتِك جوه نن العين سنين

واهو كل يوم بااحصُد أنا عناقيد فرح

يتفَرفَط العنقود ف يملا الروح حنين

يتلم تاني جوه قلبي ف ينشَرَح

يجري غرامك جوه نبضي بخَط سير

واهي لسه نبضَه خابطه نبضَه م الفرح

مصنوع كسوفك من غرامي عشان بغير

علشان بقول تِخفي الضفاير ف الطُرح

وعشان انا عاشق أكون فيكي أسير

بااهرب إليكي قبل م اتعَب وأنجَرَح

ف تلملميني وسط شَعرك م الفراق

أحسن يجيني ياخدني منك أندَبَح

فارش عَريني ف جَهزِي يلا الزواق

علشان زئيري يخاف عليكي ويتمَنَح

داخل أنا للإشتياق حرب وسباق

وخسرت أو كسبان هاقول المُقترح

نعشق ونمضي العقد فيه ألف إتفاق

نزرع ونحُصد ف الحياه عناقيد فرح.

بقلم..محمد عسل

من ديوان ‫#‏فرح‬ ‫#‏ممنوع‬