إعـتــذار ::: بقلم الشاعر المبدع / طه إبراهيم

إعتذار
*****

بعد غيبه وانتظار
كلنا بعد الفطار
قاعده حلوه جمعتنا
م العشا لحد النهار
كل واحد قال كلامه
والحديث كان بختصار
الكلام مليان شجون
واللي يغلط اعتذار
والهدوء والجو صافي
هو ده طبع الكبار
والعواطف راحه جايه
والتسامح كان شعار
مرة جد ومره لعب
ومره يقلب ع الهزار
كل واحد قال كلامه
ساعة واشتد الحوار
اللي شكك في النوايا
واللي هدد بالفرار
واللي لخبط ف الكلام
واللي عايز اعتذار
مره واحدة القعدة سخنة
زي ما يكون انفجار
واللي قال الدنيا باظت
واللي بشّر بالدمار
واللي لمح بالخيانه
واللي حاسس بإنكسار
واللي ساخط ع السياسه
واللي رافض للحوار
واللي صوته عالي جدا
جوه عينه فيها نار
العرق علي وشه باين
والبياض يقلب حمار
والغضب عم الجميع
والحليم والحر سار
والشتائم رايحه جايه
والمبادئ في انهيار
والشيطان عمال يحوم
ثانيه واحدة الوقت طار
كان ساعتها الديك بيدن
والمأذن ف انتظار
كنت نفسي ساعتها اصرخ
صرخه عاليه ف كل دار
النهرده احنا اختلفنا
والخلاف هو الشعار
قولي بس ازي هننجح
والقلوب فيها المرار
كل همك تأذي جارك
أو .... تعمله ..... بحتقار
أو تشوف الدم سايل
والمجازر ليل نهار
هو فين راح الحنان
والمشاعر ف انحضار
كنت عمي وكنت أخويا
كنت صحبي وكنت جار
كنت لما الليل يضلم
تلقي شمعه في كل دار
كنا عزوه وكنا أهل
والبيوت فيها العمار
واللي يقتدر كان يسامح
شعب طيب بقتدار
النهرده الناس بتظلم
والضعيف محكوم بنار
نفسي نرجع تاني أهل
واللي يغلط إعتذار
المحبة طرقها سهل
والعداوة سراع دمار

*******

بقلم / طه إبراهيم